Pjesëmarrje e ulët në ditën e shtatë të protestave për vrasjen Klodian Rashës

Mbrëmja e sotme, një javë pas vrasjes së 25-vjeçarit Klodian Rasha, ka parë një numër të ulët të protestuesve.

Ndryshe nga ditët e shkuara ku përballë Kryeministrisë, ministrisë së Brendshme apo Drejtorisë së Policisë Tiranë ka pasur grumbullime, shpesh edhe të dhunshme, sot situata ishte krejt ndryshe.

Gazetarët e Euronews Albania, Renaldo Salianji dhe Merin Maçi raportuan nga Sheshi Skënderbej dhe Bulevardi Dëshmorët e Kombit, se deri në orën 19:30 nuk ka pasur grumbullime të mëdha me protestues.

Salianji tha se në Sheshin Skënderbej ka pasur grupe të vogla, kryesisht nga aktivistë që qenë angazhuar për mbrojtjen e Teatrit Kombëtar, të cilët kanë nisur të shpërndahen në momentin kur kanë vënë re pjesëmarrje të ulët.

Ndërkohë që Maçi tha se në Bulevardin Dëshmorët e Kombit nuk kishte grumbullime duke vijuar prirjen që u vu re të hënën ku pati më pak protestues se ditët e shkuara.

Dita e shtatë e protestave qe njoftuar, njësoj si ditët e mëparshme, në rrjetet sociale dhe pritej të niste rreth orës 18:00.

Përballë kësaj thirrje, rreth 800 punonjës të policisë janë angazhuar për ruajtjen e institucioneve qeveritare, ndërkohë që blloku i ministrive vijoi edhe mbrëmjen e sotme të jetë i rrethuar me hekura.

Lexoni gjithashtu:

Gjykata e Tiranës lë në qeli 1 protestues, për 10 të tjerë ‘arrest shtëpie’

PD padit Ardi Veliun në SPAK: Urdhëroi dhunën kundër protestuesve

Protesta për Klodianin, familjarët dhe avokatët akuzojnë policinë për ndalime të paligjshme

Mbyllet paqësisht protesta e gjashtë për vrasjen e Klodian Rashës