Kontratë 200 milionë euro në sezon, Benzema: Më bindi Ronaldo për në Arabi

Karim Benzema është zyrtarisht lojtar i Ittihad në kampionatin arab. 35-vjeçari mbylli aventurën e tij me Realin e Madridit, ku qëndroi për 14 vite, ndërsa ashtu siç u raportua, u largua në fund të këtij sezoni. Të mërkurën është bërë dhe prezantimi i bomberit francez, i cili firmosi një kontratë 2-vjeçare, ku do të fitojë 200 mln euro në sezon.

Në deklaratën e parë pasi u bë pjesë e klubit arab, Benzema tha se për aventurën e re e bindi dhe Kristiano Ronaldo, i cili luan në të njëjtin kampionat. Ai shtoi se mezi pret ta nisë këtë sfidë të re dhe të nisë stërvitjen me shokët e ekipit.

“Mezi pres të përjetoj një ligë të re në një vend të ri. Al Ittihad ka një histori të jashtëzakonshme, tifozë tepër pasionantë dhe ambicie të mëdha futbolli për t’u bërë një forcë në Azi. Kam pasur shansin për të arritur gjëra të jashtëzakonshme në karrierën time dhe për të arritur gjithçka që mund në Spanjë dhe në Europë.

Mendoj se ka ardhur koha për një sfidë të re, për të realizuar një projekt të ri. Sa herë që kam vizituar Arabinë Saudite, gjithmonë kam ndjerë ngrohtësi dhe dashuri nga tifozët dhe njerëzit. Mezi pres të bashkohem me shokët e mi të rinj të ekipit.

Është një sfidë e re për mua, një jetë e re dhe mezi pres të filloj stërvitjen. Do të bëj gjithçka për të fituar trofe, për të shënuar, për të treguar talentin tim, për të kënaqur tifozët, klubin, presidentin, të gjithë. Është një ligë e mirë dhe ka shumë lojtarë të mirë.

LEXO GJITHASHTU:

• Benzema prezantohet në Arabinë Saudite, firmos kontratën e majme 2-vjeçare
• Zyrtare! Milani largon Paolo Maldinin