Meta i përgjigjet ashpër Ramës për akuzat në lidhje me protestën

Presidenti, Ilir Meta gjatë konferencës së përbashkët për mediat me kryetaren e Kuvendit të Kosovës, Vjosa Osmani ka folur dhe për çështje të politikës së brendshme. Z. Meta iu përgjigj akuzave që kryeministri Edi Rama ka bërë në drejtim të tij duke e cilësuar nxitës të revoltës.

“Shqiptarët e dinë shumë mirë që nuk kanë në krye të shtetit një President tinëzar dhe as palaço, kanë një President që kur e thotë një fjalë e çon deri në fund. Kam bërë një manifestim model dhe i kam bërë vetëm një thirrje popullit dhe populli u përgjigj dhe nuk merrem me inskenime dhe maskarada të tilla”, u shpreh Presidenti.

Kreu i shtetit duke komentuar më tej protestën e të rinjve për vrasjen e 25-vjeccarit Klodian Rasha nga policia, përshëndeti të gjitha institucionet ndërkombëtare që dënuan dhunën ndaj gazetarëve dhe i bëri thirrje qeverisë që të heqë dorë nga dhuna dhe intimidimi i mediave.

Presidenti Meta u pyet dhe mbi ndryshimet më të fundit në kabinetin qeveritar për dorëheqjen Sandër Lleshajt si ministër i Brendshëm dhe emërimin në vend të tij të, Blendi Çuçit, ku tha se do të përgjigjet në një kohë sa më të shpejtë me dekret.