Sherr për qiranë e stallës, vritet 41-vjeçari në Berat, arrestohet autori

Vrasje me armë zjarri në Berat.

Mëngjesin e sotëm, në oborrin e një lokali në afërsi të fshatit Goraj në Berat, 44-vjeçari Vangjel Polovina ka vrarë me armë zjarri 41-vjeçarin Ajet Guneli.

Policia sqaron se ngjarja e rëndë ka ndodhur pasi 44-vjeçari i kishte marrë me qira një stallë derrash viktimës dhe kishte mosmarrëveshje të vazhdueshme me të, pasi pretendonte se qiramarrësi e shante dhe ofendonte përditë.

Pas ngjarjes policia ka arrestuar autorin si dhe ka sekuestruar automjetin tip furgon, me të cilin 44-vjeçari tentoi të largohej, si dhe armën e zjarrit tip kallashnikov.

 “Shërbimet e Komisariatit të Policisë Berat, në bashkëpunim me strukturat hetimore të Drejtorisë Vendore të Policisë Berat dhe forcat e posaçme “Shqiponjat”, pas njoftimit të marrë se tek liqeni në afërsi të fshatit Goraj të Beratit kishte ndodhur një vrasje me armë zjarri, menjëherë kanë shkuar në vendngjarje. Falë veprimeve të shpejta profesionale dhe hetimore, krehjes së zonës dhe reagimit të menjëhershëm duke rrethuar zonën në një perimetër të gjerë bënë të mundur kapjen dhe arrestimin e autorit të dyshuar të ngjarjes, shtetasin: V. P., 44 vjeç, banues në Kuçovë.

Gjithashtu, shërbimet e Policisë kanë sekuestruar në cilësinë e provës materiale automjetin tip furgon me të cilin autori tentoi të largohej, si dhe armën e zjarrit kallashnikov me të cilën dyshohet se ka kryer krimin. Ky shtetas, mëngjesin e sotëm, në oborrin e një lokali në liqenin e fshatit Goraj ka vrarë me armë zjarri, për motive të dobëta, shtetasin A. G., 41 vjeç, pasi kishte debate të vazhdueshme dhe pretendonte se ai e ofendonte përditë”, thuhet në njoftimin e Policisë.