Sherr për dritat e makinës, arrestohet një prej autorëve të vrasjes së efektivit Xhulio Prela

Policia ka arrestuar një prej autorëve të dyshuar të vrasjes së efektivit të policisë Xhulio Prela disa javë më parë.

Burime nga policia e shtetit bëjnë me dije se pasditen e djeshme është arrestuar shtetasi Nikoll Sherrniku.

“Po në lidhje më këtë ngjarje është shpallur në kërkim ndërkombëtar dhe bashkautori tjetër shtetasi B.M, ku në bashkëpunim me homologët vijon puna intensive për lokalizimin dhe kapjen e tij.

Nga tërësia e veprimeve dyshohet se shtetasit e lartpërmendur kanë qëlluar me armë zjarri shtetasin Xh.P, pas një konflikti të çastit për motive të dobëta”, sqaron policia.

Burime bëjnë me dije se shkak për vrasjen e efektivit Xhulio Prela janë bërë dritat e makinës. Teksa ka qenë duke lëvizur në aksin ku u vra, makina e njërës prej palëve reflektonte mbi palën tjetër.

Vijon puna intensive për gjetjen dhe kapjen e shtetasit si dhe vijon kontrollin për gjetjen e armës së krimit.

Ngjarja e rëndë ndodhi më 5 dhjetor, ku efektivi i Forcave të Ndërhyrjes së Shpejtë u ekzekutua me armë zjarri në aksin rrugor Milot-Lezhë.

26-vjeçari ishte duke u kthyer nga Aeroporti i Rinasit në momentin që u ekzektua me 3 plumba nga persona të panjohur pranë fshatit Gahush. 

Pak minuta më vonë, Prela është gjetur i pajetë nga forcat e policisë brenda makinës së tij tip “Wolkswagen”, e cila kishte përfunduar jashtë rrugës.