Dalin datat e shpërblimit, 10 ditë kohë për pensionistët për të marrë bonusin 5000 lekë 

Për dhjetë ditë me radhë, deri në datën 31 dhjetor, mbi 655 mijë pensionistë do të tërheqin shpërblimin prej 5 mijë lekë të akorduar nga qeveria me rastin e festave të fundvitit.

Instituti i Sigurimeve Shoqërore ka publikuar grafikun, një ditë para nisjes së procesit, duke orientuar të moshuarit në të gjithë vendin që të paraqiten në sportelet Postës Shqiptare, sipas një plani të kordinuar në mënyrë që të mos krijohet kaos me radhët.  

Kështu, sipas grafikut në datën 21 dhjetor do të tërheqin shpërblimin pensionistët që tërheqin pensionin në këtë datë dhe ata që e kanë tërhequr pensionin në datën 1-2 dhjetor. Me të njëjtën logjikë do të vijohet deri ditën e fundit të dhjetorit, ndërsa  shpërblimet e patërhequra në dhjetor paguhen përgjatë ditëve në vazhdim, me paraqitjen e përfituesit në sportele.

Lajmi për bonusin e këtij viti u dha nga kryeministri Edi Rama në fillim të kësaj jave, ndërsa me aktin normativ që ndryshoi sërish buxhetin, fondi për këtë kategori mbërrin në 3.4 miliardë lekë.