Finalizohet operacioni “ATOS”, arrestohen 10 persona

Një tjetër operacion ndërkombëtar antidrogë i koduar “ATOS” është finalizuar.

Ky operacion u krye nga Policia e Shtetit, Policia belge dhe ajo gjermane dhe zgjati nga data 15-21 dhjetor.

“Gjatë vitit 2018, antidroga e Policisë së Shtetit, në bashkëpunim me Policinë gjermane ka zhvilluar operacionin policor të koduar “Paraguaj”, si rezultat i të cilit është sekuestruar rreth 1 ton kokainë dhe janë vënë në pranga 10 shtetas shqiptarë,” – thuhet në deklaratën e Policisë.

Më pas, operacioni ka vijuar duke u thelluar hetimet, për të identifikuar dhe arrestuar drejtuesit e grupit të strukturuar kriminal që merrej me trafikimin e kokainës nga Amerika Latine në drejtim të Belgjikës, Holandës dhe Gjermanisë.

Musa Gjikola,34 vjeç; Genti Balliu alias Flamur Balliu, 37 vjeç; Ramazan Rraja, 27 vjeç; Fioralb Rraja, 33 vjeç; Bledar Pepaj, 29 vjeç; Fatmir Xhecuka 33 vjeç u kapën dhe u vunë në pranga.

U kap gjithashtu dhe shtetasi F. Gj., për të cilin, pas arrestimit, Gjykata ka vendosur gjykimin në gjendje të lirë. Ndërkohë dy shtetas të huaj K. N. (shtetas lituanez) dhe S. C. (shtetas grek) u vunë në prangat e Policisë.

“Në kuadër të operacionit “ATOS”, në periudha të ndryshme gjatë vitit 2019 dhe vitit 2020 janë sekuestruar nga Policia belge, në bashkëpunim me Policinë shqiptare, rreth 232 kilogramë kokainë, një armë zjarri pistoletë, si dhe rreth 200 mijë euro,” – thuhet në deklaratën e Policisë.

Sipas burimeve policore ky grup kriminal funksiononte duke ngarkuar lëndën narkotike në kontenierët e bananeve nga Amerika Latine, duke e fshehur lëndën narkotike në arkat e bananeve dhe në trupin e kontenierëve.

Pasi kontenierët e pajisur nga trafikantët me GPS mbërrinin në destinacion, trafikantët, për të mos u identifikuar dhe zbuluar, organizonin vjedhje me armë të lëndës narkotike nga magazinat ose dhomat e pjekjes së bananeve.

Në këtë operacion, për ushtrimin e kontrolleve në banesat e të arrestuarve u përfshinë strukturat hetimore të antidrogës në Departamentin e Policisë Kriminale, në bashkëpunim me Drejtoritë Vendore të Policisë Tiranë, Durrës, Shkodër e Lezhë, nën drejtimin e SPAK-ut.

“Gjithashtu, një grup specialistësh të Departamentit të Policisë Kriminale kanë zhvilluar në Gjermani dhe në Belgjikë, takime të përbashkëta më homologët, për të koordinuar veprimet që çuan në goditjen e këtij grupi të strukturuar kriminal,” – përfundon njoftimi i Policisë.