Vaksina kundër COVID, ekspertët optimistë: I reziston variantit të ri të virusit

Ministri francez i Shëndetësisë, Olivier Veran mbikëqyri shpërndarjen e vaksinës antiCOVID. Në Evropë, procesi po ecën me shpejtësi. Por a do të thotë që varianti i ri i virusit i nxjerr këto vaksina jashtë loje? OBSH shpreson që jo.

“Deri tani, edhe pse kemi parë një seri ndryshimesh dhe mutacionesh, asnjë prej tyre nuk ka pasur një ndikim domethënës si në aspektin e virusit, ashtu dhe tek terapitë e përdorura deri tani, ilaçet, apo vaksinat në zhvillim”, tha Soumya Swaminathan, shkencëtare e OBSH.

Nëse shkencëtarët tregojnë një optimizëm të matur se vaksinat ende bëjnë punë është sepse 17 mutacionet gjenetike të konstatuara në variantin e ri janë të një natyre të dobët.

“Atëherë, ky është virusi juaj dhe ky është antitrupi. Normalisht virusi do të nxisë antitrupin që do të lidhet me virusin. Ju e merrni atë, ai merret nga qelizat e bardha, të cilat e hanë dhe shkatërrohet, në rregull? Tani, mutacionet që po shohim nuk janë ende aq dramatike. Ato mund të shkaktojnë një ndryshim të vogël forme. Por nuk kemi parë ende një mutacion që e bën ndryshimin e proteinës të tillë”, shprehet Julian Tang, profesor, Universiteti i Leicester.  

Pfizer dhe BioNTech, kompanitë prapa vaksinës që po shpërndahet në Evropë, thonë se ka shumë shanse që ajo të funksionojë me variantin e ri. Dhe nëse do të duhet një vaksinë e re, ajo mund të prodhohet shumë shpejt.

 “E veçanta e teknologjisë është se mund të nisim direkt të prodhojmë një vaksinë që minimizon mutacionin e ri. Teknikisht, do të jemi në gjendje të ofrojmë një vaksinë të re brenda 6 javësh”, ka deklaruar Ugur Sahin, bashkëthemelues i BioNTech.

Por enteve rregullatorë mund t’u duhet të aprovojnë ndryshimet përpara se një vaksinë e re të përdoret. Pa harruar këtu çështjen e kostos, që i komplikon gjërat.