SHBA-ja kërkon zgjidhje të re për azikërkuesit që presin në Meksikë

Zyrtarët amerikanë dhe meksikanë po diskutojnë për një program të ri amerikan për refugjatët. Ky plan u nxit nga disa azilkërkues jo-meksikanë të cilët po presin në Meksikë dhe është pjesë e përpjekjeve të presidentit të SHBA-së, Joe Biden, për të krijuar më shumë rrugë ligjore për migrim.

Programi raportohet se do të vlejë për refugjatët nga Kuba, Haiti, Nikaragua dhe Venezuela në Meksikë. Emigrantët duhet ta dëshmojnë se ishin në Meksikë para 6 qershorit për t’u kualifikuar për këtë program, tha një nga burimet e Reuters.

Sipas burimeve një zyrtar amerikan, një zyrtar meksikan dhe dy persona të njohur me këtë çështje, të cilët folën në kushte anonimiteti theksuan se çështja mbetet në diskutim dhe ende nuk është marrë asnjë vendim përfundimtar. Nuk është e qartë se sa njerëz mund të përfitojnë nga një program i tillë.

Qindra mijëra emigrantë nga këto katër vende kanë kaluar përmes Meksikës gjatë rrugës për në SHBA shkaku i trazirave politike dhe ekonomike në vitet e fundit, duke bërë presion politik mbi Bidenin, i cili kërkon rizgjedhjen si president në vitin 2024.

Ky program do të lejonte emigrantët e kualifikuar të hyjnë përmes programit të risistemimit të refugjatëve në SHBA, i cili është i qatshëm vetëm për aplikantët jashtë vendit. Ndryshe nga shumica e emigrantëve që kërkojnë azil pasi hyjnë në SHBA, refugjatët do të merrnin autorizim të menjëhershëm për punë dhe përfitime qeveritare si strehimi dhe ndihma për punësim.

Refugjatët që përdorin programin e risistemimit në SHBA mund të aplikojnë për t’u bërë banorë të përhershëm brenda një viti. Për t’u miratuar, ata duhet të vërtetojnë se përballen me persekutim për shkak të racës, fesë, kombësisë, anëtarësimit në një grup të caktuar shoqëror ose opinionit politik.

Në një deklaratë, Ministria e Jashtme e Meksikës tha se është në komunikim të vazhdueshëm me SHBA-në për zgjerimin e lëvizshmërisë së fuqisë punëtore dhe mbrojtjen e refugjatëve. Megjithatë, Meksika nuk ka arritur asnjë marrëveshje me SHBA-në, shtoi ministria.

Administrata e Bidenit ka hapur rrugë të reja legale për emigrantët, si pjesë e një strategjie më të gjerë për t’i dekurajuar njerëzit nga kalimi ilegal i kufirit SHBA-Meksikë.

LEXONI GJITHASHTU:

• Autonomia spitalore, si funksionon? Kundrejt pagesës, pacientët zgjedhin vetë mjekët
• “Drafti që do të ndikojë për 100 vitet e ardhshme në Shqipëri”- Soko jep detajet