Dëbora zbardh veriun e vendit, të gjitha akset të kalueshme pa zinxhirë

Reshjet e dëborës kanë zbardhur veriun e vendit.

Autoriteti Rrugor Shqiptar njofton se më qarkun Kukës dhe pjesërisht në Dibër ka pasur reshje bore gjatë natës.

Në Shishavec të Kukësit lartësia e dëborës arrin deri në 10 cm, ndërsa në Valbonë deri në 15 cm.

Sipas ARRSH-së në segmentin Pukë-Fushë/Arrëz-Kukës është bërë pastrimi dhe shpërndarja e kripës.

Edhe në segmentin Bulqizë-Peshkopi ka pasur reshje të dobëta dëbore, por rruga është pastruar dhe qarkullimi vazhdon normalisht.

Po kështu, ARRSH njofton se qarkullimi vazhdon normalisht dhe pa zinxhirë në të gjitha akset.

Sakaq, moti i përkeqësuar dhe era me shpejtësi deri në 17 m/s nga jugu, ka sjellë dallgë deri në 6 ballë në bregdetin e Vlorës.

Me këtë mot nuk lejohen të lëvizin mjetet e vogla lundruese si dhe peshkarexhat.