Basha: Hapja e Partisë Demokratike ndaj të rinjve është një nga prioritetet tona

Ish-kryetari i Partisë Demokratike Lulzim Basha, ka ndarë në rrjetin social facebook disa foto nga takimet me simpatizantë në lagjen Ali Dem të kryeqytetit.

Në postimin e tij, Basha shkruan se hapja e Partisë Demokratike ndaj të rinjëve dhe të rejave është një ndër prioritetet e platformës së tij për garën për kreun e PD-së.

Basha shkruan se ndryshimet kushtetuese për hapjen e sistemit zgjedhor të propozuara prej tyre, janë në interes të qytetarëve, që deputetët t’i zgjedhin ata e jo bandat kriminale.

“Harmonizimi i frymës dhe pasionit të rinisë me përvojën dhe profesionalizmin e kontributorëve ndër vite, është një hap i rëndësishëm në riorganizimin që kemi nisur, për t’i dhënë shqiptarëve një alternativë më të mirë.

Natyrisht pjesë e saj do të jenë të gjithë ata që duan ndryshim, që duan që për qeverisjen dhe deputetët të vendosin qytetarët dhe jo bandat kriminale që sot kontrollojnë shtetin, ekonominë, policinë, zgjedhjet, jetën e vendit.

Ne do të krijojmë një aleancë të gjerë politike dhe qytetare, që frikës dhe pasigurisë që ka pllakosur shoqërinë tonë, t’i kundërvihet me shpresë dhe besimin se gjërat mund të ndryshojnë për mirë, duke i dhënë rëndësi votës së qytetareve, që nis me zhbërjen e ndryshimeve kushtetuese të 2008-ës.

Që zëri i qytetarëve të dëgjohet, vullneti i tyre të përfaqësohet dhe interesat e tyre të mbrohen, do të punojmë fortë që mekanizmat kushtetues të jenë në shërbim të tyre, duke hapur listat, pastruar politikën përmes vetting-ut, kufizuar mandatin e kryeministrit, garantuar votën e diasporës, duke i dhënë më shumë kompetenca Parlamentit dhe Presidentit të Republikës, për të garantuar kontrollin dhe balancat e pushteteve”, shkruan Basha.