Zjarr në parkingun e një pallati në Tiranë, digjen disa automjete

Një zjarr ka rënë këtë të enjte në parkingun e një pallati në Unazën e Re në Tiranë, ku si pasojë janë djegur disa mjete.

Zjarrfikësja ka arritur menjëherë në vendngjarje dhe po bën evakuimin e banorëve të pallatit.

Burime nga Euronews Albania kanë mësuar se kemi të bëjmë me zjarrvënie të qëllimshme, ku një person që dyshohet se vuan nga probleme të shëndetit mendor, i ka vënë flakën makinës së tij, duke djegur dhe një makinë tjetër që ndodhej pranë saj. Në vendngjarje kanë shkuar 4 makina zjarrfikëse dhe 20 forca, që bënë të mundur evakuimin e banorëve dhe fikjen e zjarrit.

Fatmirësisht nuk ka persona të lënduar por vetëm dëme materiale, ndërkohë aktualisht po bëhet edhe ajrosja e ambienteve të pallatit. Grupi hetimor po punon për sqarimin e rrethanave të plota të incidentit.

“Më datë 13.07.2023, në Unazë të Re, ka rënë zjarr në parkingun e një pallati, dhe si pasojë dyshohet se janë djegur disa mjete.

Shërbimet e Policisë në bashkëpunim me forcat zjarrfikëse po bëjnë evakuimin e banorëve të pallatit dhe gjithashtu po punojnë për fikjen e zjarrit.

Vijon puna nga Grupi Hetimor për zbardhjen e rrethanave të ngjarjes dhe përcaktimin e shkakut të rënies së zjarrit”,-thuhet në njoftimin e policisë.

LEXONI GJITHASHTU:

• VIDEO| Vritet në pikën e karburantit 50-vjeçari shqiptar, ishte në kafe me autorin
• Aktivistit kundër luftës në Ukrainë i ndalohet hyrja në Serbi