Plan kundër Rusisë/ NATO, projekt me 4.400 faqe për t’u mbrojtur nga kërcënimi

Përforcim i kompetencave të komandantit suprem të NATO-s në Evropë, rol kyç i Gjermanisë si “bazë logjistike”, përforcim i mëtejshëm i krahut lindor dhe pajisja e njësive ushtarake me armatime të rënda.

Janë këto disa nga pikat e një plani masiv ushtarak me 4 mijë e 400 faqe, që tregon se si Aleanca e Atlantikut të Veriut po armatoset përballë një sulmi të mundshëm të Rusisë.

Lajmin e bën të ditur gjermania “Bild”, e cila në një artikull të posaçëm ilustron detajet e planit të mbrojtjes që vendet anëtare duhet të përmbushin në rast të një sulmi të urdhëruar nga presidenti Vladimir Putin.

Nga samiti në Vilnius, vetëm pak ditë më parë, sekretari i përgjithshëm i NATO-s, Jens Stoltenberg njoftoi aprovimin nga ana e aleatëve të “planeve më të kompletuara të mbrojtjes që nga fundi i Luftës së Ftohtë”, me objektiv kontrastin ndaj kërcënimeve kryesore që janë Rusia dhe terrorizmi.

Këto plane, që sipas së përditshmes gjermane janë sekrete, numërojnë mbi 4 mijë e 400 faqe në të cilat shpjegohet se cilat kapacitete duhet të forcojnë 32 vendet anëtare, përfshirë Suedinë, sa u takon trupave tokësore, ajrore dhe detare, si dhe ato të mbrojtjes kibernetike dhe hapësinore.

Komandantit suprem të NATO-s në Evropë, rol që aktualisht mbahet nga gjenerali amerikan Kristofer Kavoli, do t’i jepen kompetenca shtesë për rastet e kërcënimit.

Kjo do të thotë se ai do të mund të marrë vendime pa iu drejtuar më parë organeve të NATO-s, sqaron më tej gazeta gjermane.

LEXONI GJITHASHTU:

• Nis korrja e grurit, fermerët: Çmimi 25 lek për kg, nuk nxjerrim as shpenzimet
• “Kanë marrë arratinë”- Prençi: Te inceneratorët ka dhe ish-politikanë të djathtë