Shqipëria tashmë me një gjyqtare të njohur nga FIFA

Shqipëria për herë të parë në historinë e futbollit, ka një gjyqtare femër me stemën e FIFA-s. Emanuela Rusta është gjyqtarja nga Kolegjini i Elbasanit.

Rusta ka arbitruar ndeshjet e Superligës si dhe është e para që ka drejtuar ndeshjen përuruese në “Arenën Kombëtare” mes vajzave të Vllaznisë dhe Apollonisë.

Në Janar të vitit 2019, Rusta u përzgjodh si gjyqtare e FIFA-s, duket fituar një nga katër vendet që ishin të lira falë testimeve që u zhvilluan në Lisbonë, ku morën pjesë 38 gjyqtare femra.

Arbitrja Emanuela Rusta, e ftuar në emisionin “Good Morining Albanians” në Euronews Albania është shprehur se këtë profesion e zgjodhi rastësisht, por edhe për të sprovuar veten duke provuar diçka ndryshe.

Ndër të tjera gjyqtarja shqiptare ka treguar se gjatë kësaj rruge ka patur edhe njerëz, të cilët e kanë paragjykuar.

“Ka patur paragjykime, por për mua kanë qenë pjesë e mbështetjes”, është shprehur Emanuela.

E pyetur sesi e shikon futbollin e femrave në Shqipëri, gjyqtarja është shprehur se po zhvillohet çdo ditë e më shumë.

“Në Shqipëri, para 5 viteve nuk ka qenë kaq i zhvilluar sa është sot, ndërsa tani po zhvillohet dita-ditës dhe femrat po e kuptojnë më mirë dhe po e luajnë njësoj si meshkujt”, ka shtuar Emanuela.

Rusta e ka mbyllur fjalën e saj duke u shprehur se dëshira e saj për të ardhmen do të ishte të arbitronte finalen e Kupës së femrave në botë.