Izraelitët rikthehen në rrugë për të protestuar kundër reformave në gjyqësor

Mijëra izraelitë u rikthyen në rrugët e Tel Avivit të enjten në mbrëmje, për të protestuar kundër votimit të disa ndryshimeve kyçe në gjyqësor nga Parlamenti i vendit, të cilat e kanë ndarë vendin dhe kanë nxitur kritika nga aleatët e huaj.

Të hënën, kryeministri Benjamin Netanyahu dhe aleatët e koalicionit të tij e kaluan projektligjin me ndryshime kontroverse në Parlament, i cili hap rrugën për një qeveri më autoritare.

Ky projektligj e kufizon klauzolën e “arsyeshmerisë” që përdorej nga Gjykata Supreme për t’i rrëzuar vendimet e Qeverisë, të cilat gjykatësit i cilësonin si jokushtetuese.

Duke valëvitur flamuj izraelitë dhe duke brohoritur “demokraci, demokraci!”, protestuesit vërshuan rrugët e Tel Avitit të enjten në mbrëmje, i cili ka qenë kryeqendra e protestave qëkur Netanyahu e shpalosi për herë të parë pakon për ndryshimet në gjyqësor në janar.

Reformat kontroverse e kanë ndarë vendin në dysh dhe kanë nxitur njërën prej lëvizjeve më të mëdha protestuese në historinë e Izraelit.

LEXONI GJITHASHTU:

• Izrael, miratohet reforma e kontestuar, parlamenti shpërfill protestat qytetare
• Mijëra izraelitë marshojnë kundër projektligjit për gjyqësorin