Spalletti trajneri i ri i Italisë, ish-kreu i Napolit merr drejtimin e “të kaltërve”

Luciano Spalletti është përzgjedhur për detyrën e trajnerit të kombëtares italiane të futbollit. Vendimi u konfirmua nga drejtuesit e Federatës.

Trajneri toskan do të marrë drejtimin më 1 shtator, ndërkohë që prezantimi i tij zyrtar do të bëhet në fillim të muajit shtator në qendrën stërvitore të ekipit, thuhet në njoftimin zyrtar të Federatës së Futbollit.

“Ne e mirëpresim Spallettin. Ekipi Kombëtar kishte nevojë për një trajner të madh dhe unë jam shumë i lumtur që ai pranoi të drejtojë të kaltrit”, deklaroi kreu i futbollit Italian, Gabriele Gravina, i cili theksoi se entuziazmi dhe eksperienca e trajnerit të ri janë thelbësore për sfidat që e presin Italinë në muajit në vijim.

Luciano Spalletti zëvendëson në këtë detyrë ish-trajnerin Roberto Mancini, i cili u dorëhoq pas përplasjeve me Presidentin e Federatës.

Ai do të drejtojë Italinë në ndeshjet kualifikuese për kampionatin europian të futbollit. Arritja më e madhe në karrierën e tij është shpallja kampion në Serie A sezonin e kaluar me ekipin e Napolit. 64-vjeçari ka drejtuar në të kaluarën edhe ekipet e Romës dhe Interit.

LEXONI GJITHASHTU:

• Roberto Mancini largohet nga Italia, “të kaltrit” në kërkim të trajnerit të ri
• Telushi largohet nga Partizani 4 javë pas kontratës, shkak përplasjet me trajnerin