Ekuadorianët sfidojnë anarkinë, kush kryeson zgjedhjet në vendin latin

Pavarësisht frikës, dita e zgjedhjeve në Ekuador u mbyll pa akte dhune. Qendrat e votimit dhe kandidatët presidencialë u mbrojtën nga policia dhe ushtria.

Në veçanti, Christian Zurita, që zëvendësoi kandidatin e vrarë Fernando Villavicencio, me zor e tregoi fytyrën. Ai mbulohej vazhdimisht nga veshje anti-plumb dhe roja të armatosura.

Vetëm pak orë para votimit, ai mori kërcënime me vdekje. Ndaj, Komisioni Ndër-Amerikan për të Drejtat e Njeriut i bëri thirrje qeverisë ekuadoriane të miratojë menjëherë masat për garantimin e jetës së tij.

“Ne të gjithë shpresojmë se fituesi do të përpiqet ta bëjë vendin më të mirë, pasi në vitet e fundit vetëm kemi rënë në korrupsion, pasiguri dhe rrënim ekonomik. Shumë ekuadorianë janë detyruar të emigrojnë në vende të tjera”, tha Andres Pucha, banor i qytetit Tarkui.

Sondazhet nxjerrin në avantazh kandidaten Luisa Gonzales, nga Lëvizja Revolucionare Qytetare, që po udhëheq me mbi 32 për qind të votave.

Më herët, shumë qytetarë ishin shprehur të frikësuar të dilnin të votonin. Ata thanë se preferonin të qëndronin në shtëpi dhe të paguanin gjobën, duke qenë se votimi është i detyrueshëm në Ekuador.

Por, atëherë kur votimi ishte mbyllur, Komisioni Kombëtar Elektoral njoftoi pjesëmarrjen “historike” prej 82.26 për qind.

LEXONI GJITHASHTU:

• Tronditet sërish Ekuadori 5 ditë përpara zgjedhjeve, vritet një tjetër politikan
• Protesta në Ekuador, vrasja e kandidatit për president, qytetarët kërkojnë drejtësi