Derdhet në det uji i Fukushimës, procesi do të zgjasë 30 vjet

Japonia do të nisë të enjten derdhjen në oqeanin Paqësor të ujit radioaktiv nga centrali bërthamor i Fukushimës, i goditur nga cunami i vitit 2011.

Vendimi vjen disa javë pasi Agjencia e OKB-së për energjinë bërthamore aprovoi planin, i cili megjithatë kundërshtohet nga fqinjët e Japonisë.

Rreth 1.34 milionë tonelata ujë, mjaftueshëm për të mbushur 500 pishina me përmasa olimpike, janë akumuluar që kur cunami dëmtoi impiantin 12 vjet më parë.

Uji do të derdhet përgjatë 30 viteve, pasi të jetë filtruar dhe holluar. Autoritetet do t’i kërkojnë operatorit të impiantit të bëhet gati për nisjen e procesit më 24 gusht, nëse kushtet e motit dhe detit do të jenë të përshtatshme.

Vetë kryeministri i Japonisë, Fumio Kishida vizitoi impiantin ditën e diel, duke shtuar spekulimet se derdhja e ujit ishte e pashmangshme.

Qeveria ka deklaruar se çlirimi i ujit është një hap i domosdoshëm në procesin e gjatë e të kushtueshëm të çmontimit të impiantit, që ndodhet në bregun lindor të vendit, rreth 220 kilometra në veri-lindje të kryeqytetit Tokio.

Japonia e ka mbledhur dhe magazinuar ujin e ndotur në cisterna prej më shumë se një dekade, por hapësira po mbaron.

Në 2011-n, një cunami i shkaktuar nga një tërmet me magnitudë 9 përmbyti tre reaktorët e impiantit bërthamor të Fukushimës. Ngjarja konsiderohet si katastrofa më e rëndë në botë pas asaj të Çernobillit.

LEXONI GJITHASHTU:

• BE heq ndalimin e importit të ushqimeve nga Fukushima, pas katastrofës bërthamore
• Japonia hapi pjesë të qytetit pranë Fukushimës, ish-popullsia nuk mendon të kthehet