Rriten eksportet bujqësore, buxheti 2020 jep më shumë fonde, mungojnë politikat bujqësore

Fermerët në Shqipëri po orientohen për nga kulturat bujqësore më të kërkuara në tregjet e huaja, prej të cilave sigurojnë më shumë të ardhura.

Ata kërkojnë më shumë mbështetje nga qeveria me subvencione për produketet shqiptare.

Sipas INSTAT, eksportet e grupit të produkteve “ushqime, pije, duhan”, pra eksportet bujqesore u rriten me 15%, gjatë tetemujorit janar-gusht 2019, në krahasim me të njëjtën periudhe të vitit të kaluar.

Eksportet arritën shifrën e 22.7 miliardë lekëve ose 186 mln euro. Investimet kryesisht në sera që sigurojnë prodhim bujqësor përtej sezonit dhe rritja e standardeve ka shtuar eksportet dhe të ardhurat në familjet fermere.

Politikat lehtësuese fiskale dhe mbështetja me fonde të ndryshme përmes programeve te donatoreve ka rritur interesin e fermerëve për shtimin e sipërfaqeve të mbjella me produkte bujqësore.

Fondi më i rëndësishëm është programi IPARD i Bashkimit Evropian.

Shoqatat e biznesit ankohen se qeveria nuk subvencionon produktet tona bujqesore dhe se buxheti nuk ka politika bujqësore të mirëfillta.

Granti për bujqësine për vitin 2020 është vetëm 4 mln euro.