“Interneti po keqedukon fëmijët”, sociologët: Do na duhen më shumë burgje se shkolla

Fjalori banal te të miturit zë një pjesë të madh të komunikimit mes tyre.

Në rrjetet sociale, thuajse çdo ditë publikohen video ku tregohen rastet e dhunës së të miturve midis njeri-tjetrit, bullizime dhe ofendime.

“Interneti po na sjell realitetin në mënyrë të shpejtë. Nga ana tjetër po e nxit këtë brez t’i imitojë dhe t’i jap kurajë se realiteti është i tillë dhe kështu duhet t’ia dalim, përmes dhunës, bullizimit dhe të fortit”, thotë  Marsida Simo, sociologe.

Marsida Simo ngre shqetësimin se nuk po merren masa konkrete nga institucionet, por dhe vetë prindërit. Përdorimi i rrjeteve sociale, sipas sociologes, po zbeh rolin e prindërve në edukimin e fëmijëve.

Nuk ka një masë apo një menaxhim konkret, qoftë nga ana e prindërve apo më pas të mësuesve apo dhe të institucioneve të më gjerë, që e dinë këtë situatë por ende nuk kanë gjetur një zgjidhje konkrete… Kam frikën se më shumë se sa po prindërojnë prindërit, po prindëron interneti, Tik Toku dhe prindërit shohin një fëmijë të tjetërsuar”, shprehet sociologia.

Nëse do të vazhdojmë me këto ritme, sociologia thotë se e ardhmja nuk do të jetë aspak pozitive. Shoqëria do të jetë e ndarë në dy pjesë, midis atij që dhunon dhe viktimës.

“Do kemi nevojë më shumë për burgje sesa për shkolla”, thotë sociologia.

LEXONI GJITHASHTU:

• Lypnin në rrugë bashkë me fëmijët e mitur, procedohen penalisht dy qytetare
• Shfrytëzonin fëmijët për të lypur, e “pësojnë” 5 persona në Durrës