SHBA: Linjat ruse të mbrojtjes po thyen, Ukraina po përparon dukshëm

Ukraina ka bërë “përparim të dukshëm” në kundërofensivën e saj jugore gjatë 72 orëve të fundit, ka thënë një zyrtar i lartë i sigurisë amerikane, pasi Kievi deklaroi se trupat ukrainase kishin depërtuar vijën e parë të mbrojtjes së Rusisë në disa vende.

Në Uashington, zëdhënësi i Këshillit të Sigurisë Kombëtare të Shtëpisë së Bardhë, John Kirby tha se SHBA-ja “kishte vërejtur gjatë 72 orëve të fundit një përparim të dukshëm nga forcat e armatosura ukrainase… në zonën e Zaporizhzhias”.

“Ata kanë arritur njëfarë suksesi kundër linjës së dytë të mbrojtjes ruse”, tha Kirby, duke shtuar se i takonte Ukrainës se si të përfitonte nga ky sukses.

Ditët e fundit, analizat e fushëbetejës perëndimore kanë treguar se forcat ukrainase po depërtojnë në linjat ruse të mbrjtjes midis Robotyne, një fshat i rimarrë nga Ukraina këtë javë dhe Verbove në rajonin e Zaporizhzhia.

Synimi i Kievit është të përparojë drejtpërdrejt në jug në Detin Azov, duke ndërprerë hyrjen tokësore ruse në Krimenë e pushtuar.

Por forcat ruse kanë vendosur barriera të gjata dhe të thella në të gjithë terrenin, duke përfshirë kurthe tankesh, fusha të minuara dhe mbrojtje të tjera, për të ngadalësuar përparimin e Ukrainës.

Të premten, zëvendësministrja e mbrojtjes, Hanna Maliar, tha gjithashtu se trupat e Kievit po përparonin në rajonin e Zaporizhzhia.

“Ka një ofensivë në disa drejtime dhe në zona të caktuara. Dhe në disa vende, në zona të caktuara, kjo linjë e parë u thye”, tha Maliar për televizionin ukrainas.