Sekreti i vaksinës, replika presidencë-qeveri për mospublikimin e kontratës 

Presidenca e konsideroi të pajustifikuar vendimin e qeverisë për ta konsideruar si sekret kontratën me kompaninë Pfizer. Por kryeministri Edi Rama e mbrojti sërish vendimin duke thënë se marrëveshja për vaksinën edhe konfidenciale me çdo vend dhe jo vetëm me Shqipërinë. 

Këtë javë nuk do të mbërrijnë në Shqipëri dozat e para të vaksinës anti-covid, sipas marrëveshjes që është lidhur me kompaninë Pfizer. Lajmi është konfirmuar nga kryeministri Edi Rama, i cili tha se kompania ka deklaruar shtyrjen me një javë të procesit të dorëzimit.

“Pfizer ka bërë një deklaratë që ka ndezur zjarr, polemikën me shumë shtete të BE-së, duke thënë që do ta shtyj për një javë procesin e dorëzimit të dozave që ka kontraktuar”.

Të paktën gjashtë vende të BE-së shprehen ankesa javën e kaluar për mos-përmbushjen e kontratës nga ana e kompanisë Pfizer e cila njoftoi se situata është e përkohshme dhe do të stabilizohet deri në fund të shkurtit.

Ndërkohë vazhdon të shkaktojë polemika mbajtja sekret e kontratës. Drejtori i Kabinetit tw Presidentit, Edmond Panariti ka kërkuar më tepër transparencë për marrëveshjen e siguruar me kompaninë Pfizer.

“Po çfarë është vaksina Fajzer (Pfizer) e rrethuar nga qeveria me anonimat dhe sekret pas kontraktimit? A duhet të dimë diçka më shumë për të para se ti japin dhe hapim krahun? Pse ajo dhe jo një tjetër? Askush mjerisht në Kuvend nuk i shtroi këto pyetje, por thjesht votoi symbyllur. Jam i sigurt që në Parlamente të tjera do të pyesnin, kërkonin sqarime dhe do të kishte debat,” – tha Edmond Panariti, drejtor i kabinetit në Presidencë.

Ndërsa Rama e mbrojti sërish vendimin, duke thënë se ky është një kusht i kompanisë me të gjitha vendet. Ai iu referua edhe polemikave me BE-në dhe ambasadën e Francës, duke thënë se nuk e ndalon askush të thotë opinionin e tij.

Lexoni gjithashtu:

Mbërritja e dozave të vaksinës Pfizer mund të shtyhet, konfirmon kryeministri Rama për Euronews Albania