S’ka strehim për azilkërkuesit meshkuj, qeveria në Belgjikë: Prioritet janë familjet

Belgjika po ndalon përkohësisht strehimin e azilkërkuesve meshkuj, pasi qeveria thotë se vendi ka mungesë të hapësirave dhe se prioritet tani do t’u jepet familjeve azilkërkuese. Afati kohor i këtij i përfundimit të këtij vendimi nuk është përcaktuar.

“Sot, realiteti është se ne nuk kemi vende të mjaftueshme, ndaj më duhet të marr vendime të vështira, vendime shumë, shumë të vështira”, tha Nicole de Moor, Sekretarja e Shtetit belg për Azilin dhe Migracionin.

Në kryeqytet, Bruksel, aktivistë dhe emigrantë morën pjesë në një protestë për të denoncuar vendimin e qeverisë.

“Ata flasin për zvogëlimin e numrit të vendeve, ndërkohë që ka qendra që mbahen të mbyllura. Kjo është me të vërtetë për të ardhur keq”, shprehet Taslim, përfaqësues i azilkërkuesve “Zëri i të padokumentuarve”.

Alexis Deswaef, nënkryetar i Federatës Ndërkombëtare për të Drejtat e Njeriut, e quajti masën e qeverisë “të paligjshme”.

LEXONI GJITHASHTU:

• Belgjika shkatërron 131 milionë euro pajisje anti-COVID, kanë dalë jashtë funksioni
• Eutanazia, vdekje dinjitoze? Mjeku shqiptar në Belgjikë: Është ndihmë për pacientin