Rrjedhje gazi në shkollën jopublike në rrugën ‘Don Bosko’, 6 nxënës dërgohen në spital

Nxënësit e një shkolle në kryeqytet janë evakuuar mëngjesin e sotëm pas rrjedhjes së gazit në ambientet e saj.

Ngjarja ka ndodhur në kolegjin e vajzave, ‘Qatar College’, një shkollë 9-vjeçare jopublike në rrugën “Don Bosko”.

Shkak sipas burimeve, është bërë një bombol gazi që përdorej për ngrohjen e ujit, të sistemit të ngrohjes në shkollë.

Problemi është shfaqur në të gjithë ambientin e shkollës, ku menjëherë është bërë evakuimi i të gjithë nxënësve për arsye sigurie.

Gjithashtu, janë dërguar në spital gjashtë prej nxënësve, ku po ju jepet ndihma mjekësore, pa probleme për jetën. 

Ndërkohë, nga ana e QSUT është bërë me dije se pranë Urgjencës së Sëmundjeve të Brendshme janë paraqitur me ambulancë 3 pacientë të ekspozuar nga gaze, të moshës rreth 15 vjeç.

Tre pacientë të moshës 12-14 vjeç të intoksikuar janë paraqitur me ambulancë pranë Urgjencës Pediatrike.

“Mjeku toksikolog ka kryer konsultën mjekësore dhe ka konstatuar që janë koshiente, paraqesin simptoma të lehta të intoksikacionit si dhimbje koke, të përziera dhe pak ansioze. Pacientët janë me paramentra stabël, jashtë rrezikut për jetën dhe janë shtruar në pavijon për monitorim”, bën me dije QSUT.