Mosha e tretë përballë krizës së “sigurimeve”, 230 mijë pensione të pjesshme

Në Shqipëri janë mbi 230 mijë individë që nuk përfitojnë pensione të plota. Pagesat e pjesshme po nxjerrin në pah një plagë të madhe sociale, që vjen nga mospagimi i sigurimeve shoqërore.

Më shumë se 231 mijë pensionistë nuk marrin pensione të plota në Shqipëri, për shkak se në historikun e tyre, nuk kanë plotësuar vitet e plota të punës. Të dhënat e Institutit të Sigurimeve Shoqërore tregojnë se masa e plotë e pensionit është e vështirë të përfitohet në pleqëri, për shkak të problemeve që lidhen me kontributet e munguara.

Në vitin 2022 pensionistët me pagesë të pjesshme ishin sa 48% e totalit të personave që përfitojnë pension pleqërie. Në vitin, 2021 ata përbënin nga 45% të numrit të përgjithshëm.

Në shifra, vitin e kaluar numëroheshin 231,730 individë që morën pagesa të pjesshme.

Numri i total i pensioneve të pleqërisë në vitin 2022 pësoi rritje vjetore me 4.6%, por ato me pensione të pjesshme u shtuan me 12%.

Rritja më shpejtësi e përfituesve me pension të pjesshëm tregon se mosha e tretë rrezikon varfërinë e ekstreme, teksa inflacioni ka qenë i lartë dy vitet e fundit.

Skema e sigurimeve shoqërore lejon që të gjithë personat të cilët nuk i kanë plotësuar vitet e nevojshme të punës sipas ligjit, të përfitojnë pension të pjesshëm të pleqërisë. Çka do të thotë se ata do të marrin pensionin për aq vite pune sa kanë investuar në skemë, por jo më pak se 15 vite gjithsej.

LEXONI GJITHASHTU: 

• I përjashtuar nga kombëtarja, Gjermania rikthen kampionin e botës
• Rama ndryshoi qeverinë, Klosi: Vizioni ynë i 2030 kërkon forca e teknicienë të rinj