Lista e kandidatëve të AAK në zgjedhje, Teuta Haxhiu paralajmëron ankimim në instancat më të larta

Komisioni Qendror i Zgjedhjeve në Kosovë do të marrë sot vendimin përsa i përket ankesave për moscertifikim të subjekteve politike për kandidatët që KQZ vendosi të mos kandidojnë sepse kanë vepra penale.

Teuta Haxhiu, kandidatja për deputete e “Aleancës për Ardhmërin e Kosovës” gjatë intervistës për Euronews Albania komentoi ankesën e partisë ku ajo bën pjesë.

“Ne presim një vendim pozitiv dhe rasti i zotit Dreshaj edhe pse vendimi ishte i formës së prerë kanë kaluar tre vite dhe nuk ka asnjë problem ligjor. Më duket e padrejtë edhe për subjektet e tjera politike. Moslejimi i kandidimit është shkelje e të drejtës për të votuar, por edhe për t’u zgjedhur dhe duhet që institucionet të mos kishin lejuar të arrinim këtu”,-tha zonja Haxhiu.

Më tej ajo u shpreh se partia ku ajo bën pjesë në varësi të vendimit do e çojë çështjen në instancat e tjera ku do bëhen ankimimet.

“Do përdorim gjithë mekanizmat e kushtetutës pasi e konsiderojmë të padrejtë për kandidatët tanë. Këto janë dhe gabime paraprake të KQZ-së, që nuk duhet të kishte arritur deri këtu çështja”,- u shpreh për Euronews Albania kandidatja për deputete e AAK-së.

Znj.Haxhiu gjatë intervistës tha se ata kanë kandidatë të tjerë që mund t’i përfshijnë në listë, por e konsiderojnë shumë të padrejtë nëse gjykohen për raste që kanë kaluar kohë dhe janë marrë vendimet.

Haxhiu tha se partia ku ajo bën pjesë do ndërmarrë nismën për ndryshimin e ligjit të zgjedhjeve.

“Ligji për zgjedhjet nuk është ndryshuar për shkak të subjekteve politike të cilat kanë vendosur interesat e tyre para atyre të shtetit. Po të ndryshohej ky ligj nuk do të ishim në këtë situatë”,- tha zonja Haxhiu.

Ajo komentoi edhe paralajmërimin ndaj KQZ-së të presidentes në detyrë zonja Osmani.

“Po te isha në pozitën e saj do të merrja vendimin për shkarkimin e zonjës Dako nëse është i padrejtë vendimi i saj dhe ka shkelur Kushtetutën. Por vetëm paralajmërimi është një mesazh jo i mirë për institucionet e pavarura”,-u shpreh Teuta Haxhiu.