Udhëheqja në Karabak pranon propozimin rus për armëpushim

Ndërsa ofensiva e Azerbajxhanit hyri në ditën e dytë, informacionet nga selia e autoriteteve de facto të armenëve etnikë në këtë rajon thanë se kanë pranuar një propozim nga misioni paqeruajtës rus për një marrëveshje armëpushimi

Është e paqartë nëse kjo lëvizje do ta kënaqë Bakun, përderisa numri i viktimave është rritur në përshkallëzimin më vdekjeprurës ushtarak në këtë rajon në tre vjetët e fundit.

Koncesioni erdhi disa orë pasi Azerbajxhani sinjalizoi synimin e tij që të vazhdojë operacionet ushtarake të nisura një ditë më herët në Nagorno-Karabak, pavarësisht thirrjeve që të ndalë armiqësitë që deri më tani kanë lënë disa të vdekur në rajonin e shkëputur, ku banojnë kryesisht armenë etnikë. Thirrje për ndalje të armiqësive janë bërë nga Kombet e Bashkuara, fuqitë perëndimore dhe Rusia.

Ministria e Mbrojtjes e Azerbajxhanit tha mëngjesin e 20 shtatorit se po vazhdonte “me sukses” atë që e ka cilësuar si “operacion kundër terrorizmit”, duke shënjestruar sabotuesit.

Zyra e presidentit të Azerbajxhanit, Ilham Aliyev, lëshoi një deklaratë në të cilën thuhej se ai i ka thënë sekretarit amerikan të Shtetit, Antony Blinken, se “masat kundër terrorizmit do të ndalen nëse [forcat në Karabak] ulin armët”.

Këshilli i Sigurimit i Kombeve të Bashkuara më 21 shtator do të mbajë një mbledhje urgjente, pasi komuniteti ndërkombëtar po kërkon mënyra për të shmangur një intensifikim të konfliktit të gjatë. Azerbajxhani dhe Armenia kanë zhvilluar dy luftëra për kontrollin e rajonit të shkëputur, me luftën e fundit që u zhvillua para tre vjetësh.

“Sekretari i Përgjithshëm [i OKB-së, Antonio Guterres], kërkon që menjëherë të ndalen luftimet, të shtensionohet situata dhe të ketë respektim të rreptë të armëpushimit të arritur më 2020, si dhe të ligjit humanitar ndërkombëtar”, tha Stephane Dujarric, zëdhënës i shefit të OKB-së.

LEXONI GJITHASHTU:

• Azerbajxhani nis operacion “kundër-terrorizmit” në Nagorno-Karabak
• “Jemi prag katastrofës”- Armenia kërkon mbledhje urgjente të OKB-së për Karabakun