EMRI| Mbi 250 mijë euro të fshehura në makinë, 58-vjeçari arrestohet në Durrës

Muhamed Hoxha, 58 vjeç është arrestuar këtë të shtunë në portin e Durrësit, pasi gjatë një kontroll në makinën e tij policia gjeti dhe sekuestroi 251 295 euro të padeklaruara dhe medikamente mjekësore.

Operacioni, në vazhdën e operacioneve të njëpasnjëshme për goditjen e grupeve kriminale që tentojnë pastrimin e parave, si  dhe për sekuestrimin e aseteve dhe vlerave monetare që rrjedhin nga veprimtaritë kriminale.

58-vjeçari vinte nga Italia dhe tentoi t’i fuste në Shqipëri, pa i deklaruar, paratë dhe medikamentet që kishte fshehur në automjetin e tij.

Njoftimi i policisë

Si rezultat i operacionit policor të koduar “Fluksi 4″, i zhvilluar nga shërbimet e Policisë Kufitare, në bashkëpunim me autoritetet doganore, u kap në flagrancë dhe u arrestua shtetasi M. H., 58 vjeç, banues në lagjen nr. 13, Durrës, i cili vinte nga Italia dhe kishte fshehur automjetin e tij, 251 295 euro dhe medikamente, me qëllim futjen e tyre në Shqipëri, pa i deklaruar sipas ligjeve në fuqi.

Shuma e parave dhe medikamentet u sekuestruan në cilësinë e provës materiale. Vijojnë hetimet për dokumentimin ligjor të këtij rasti.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme, për veprat penale “Mosdeklarimi në kufi i të hollave dhe i sendeve me vlerë”, “Pastrimi i produkteve të veprës penale ose veprimtarisë kriminale” dhe “Kontrabanda me mallra të licencuar”.

LEXONI GJITHASHTU:

• Lihet në burg Klered Bozhanaj, avokati i tij kërkon ekspertim të gjendjes mendore
• Zbulohet varreza e lashtë gjatë punimeve në tubacionin e gazit në Peru