Zjarre në Patos e Durrës, përfshihet nënstacioni elektrik te “Ofiçina”. Reagon Balla

Djegia e mbeturinave në zonën e njohur si “Ofiçina” në Patos, ka shkaktuar një zjarr masiv që ka djegur një sipërfaqe të konsiderueshme me ullinj dhe pemë frutore.

Në vendngjarje për neutralizimin e flakëve ndodhen mjetet zjarrfikëse, shërbimet e policisë Fier, dhe disa grupe të Forcave të Ndërhyrjes së shpejtë.

Situata vijon të mbetet kritike ndërkohë që banorët e zonës të alarmuar nga kjo situatë pohojnë se nderhyrja e shpejtë e shërbimeve zjarrfikëse bëri të mundur largimin e rrezikut nga banesat dhe puset e naftës.

Flakët kanë përfshirë dhe nënstacionin elektrik, ku OSSH Patos është detyruar të stakojë energjinë elektrike si masë të nevojshme sigurie.

Ndërkohë që një vatër zjarri është aktivizuar mbrëmjen e kësaj të shtune në një sipërfaqe toke bujqësore në Karpen të Shijakut.

Sipas informacioneve të siguruara nga vendngjarja, forcat zjarrfikëse nuk kanë mbërritur ende për të punuar për shuarjen e flakëve, të cilat po përhapen me shpejtësi prej erës së fortë.

Reagim i Ministrit të Brendshëm, Taulant Balla për situatën e zjarreve në vend:

Në lidhje me situatën e zjarrve në vend ka reaguar dhe Ministri i Brendshëm Taulant Balla.

“Po ndjekim situatën në Bashkinë Patos, fshati Margëlliç, ku po luftohet me zjarrin, i cili ka marrë përmasa tepër të mëdha. Forcat zjarrëfikëse të Patosit, Roskovecit, Fierit, kompanisë Albpetrol po punojnë në disa drejtime për të mbrojtur zonat e banuara, ndërsa janë nisur forca edhe nga Lushnja, Vlora dhe Berati. Policia e Shtetit ka dërguar efektivë të shumtë të FNSH, ndërsa ka arrestuar autorin e dyshuar të kësaj zjarrvënie”, shkruan Balla në facebook.

LEXONI GJITHASHTU:

• Ndezën zjarre të qëllimshme në Durrës dhe Kavajë, vihen në pranga autorët
• EMRI| Bëri shkelje në tendera, arrestohet ish-drejtori i burgut në Lushnjë