Rama ironizon programin ekonomik të PD-së, reagon Bardhi

Kryeministri Edi Rama ka ironizuar kryetarin e Partisë Demokratike Lulzim Basha për programin ekonomik të cilin prezantoi mesditën e sotme.

Përmes një postimi në Twitter Rama e ka konsideruar program me premtime të gënjeshtërta angazhimin e prezantuar nga Basha. Ai e nënkuptoi këtë gjë me një premtim të cilin Basha e pati bërë në garën elektorale për Bashkinë e Tiranës, realizimin e një linje tramvaji, projekt i cili nuk u realizua.

Programi i PD në 2021 si tramvaji i Tiranës në 2011?Gjumë të ëmbël?

— Edi Rama (@ediramaal) January 28, 2021

Komentit të Ramës iu përgjigj më vonë, po me Twitter, Sekretari i Përgjithshëm i PD-së, Gazment Bardhi, i cili tha se kryeministri duhet të tregohet i qetë pasi “ky është vetëm fillimi i angazhimeve serioze” që sipas Bardhit Rama “nuk është mësuar t’i mbajë”.

Rama qetësohu. Ky është vetëm fillimi.
E dimë se ti nuk je mësuar të përballesh kurrë me angazhime serioze që do të mbahen e nuk do të shkelen. Pas 8 vitesh këtë e dinë shumë mirë të gjithë shqiptarët ndaj do të të largojnë më 25 prill.

— Gazment Bardhi (@GazmentBardhi) January 28, 2021

Ditën e sotme Basha prezantoi një pjesë të programit ekonomik të PD-së ku si pika kryesore ishin ulja e taksave, rritja e pagës minimale, vendosja e njëtakse të sheshtë 9% për pagat mbi 30 mijë lekë dhe krijimin e mbi 110 mijë vendeve të punës.

Programin Basha e cilësoi angazhim dhe jo premtim, angazhim të cilin nëse nuk do ta realizojë do të largohet nga detyra e mundshme si kryeministër.

Lexoni gjithashtu:

PD prezanton programin ekonomik, Basha: Nëse s’realizohet largohem nga detyra