Gazetaria furnizon politikën, njerëzit e medias që do të garojnë në zgjedhjet parlamentare në Kosovë

Faton Abdullahu nga një analist politik kaloi në PDK, ashtu siç vepruan edhe Ardian Kastrati e ish-gazetari Asllan Bajrami.

Ndërkohë, ish analistët si Armend Muja e Ardian Gola ju bashkuan Lëvizjes Vetëvendosje. Për analistët, këto lëvizje janë cikël në jetën publike.

“Mund të ketë ndikime pozitive tek partitë, por në të njëjtën kohë lirohen parimisht disa vende dhe hapësirë për gazetarët e rinj dhe kështu që mendoj se ky cikël do të vazhdojë gjithmonë në Kosovë, për shkak se jemi vend i vogël dhe nuk është se kemi shumë kuadro”, shprehet Kosovë Gjoci, analist.

Megjithatë, jo të gjithë patën sukses në rrugën e vështirë të politikës.

Edhe në zgjedhjet e kaluara, shumë gazetarë e analistë të ndryshëm të jetës publike e të televizionit i janë futur rrugës së politikës. Por, jo të gjithë, në fakt, pjesa dërmuese e tyre kanë dështuar, andaj si rrugëzgjidhje kanë gjetur sërish rikthimin në fushën e gazetarisë.

E pikërisht, flirtimi herë me politikën e herë rikthimi në media, nuk cilësohet si veprim i duhur nga gazetarët.

“Për mua është e papranueshme se si një gazetar, pasi e lë gazetarinë, shkon e merret me politikë, dhe t’i kthehet sërish gazetarisë, meqë mund të dyshohet pastaj në pavarësinë e tij gjatë punës në profesionin e gazetarit”, thotë Blerta Dalloshi- Berisha- Gazetare

Ndërkohë, zyrtarisht ende nuk ka filluar fushata elektorale për zgjedhjet e 14 shkurtit. Mundësia e joshjes nga politika të personave nga fusha e medias, edhe më tej vazhdon.