Sula: Gjyqtarët e Kushtetueses do marrin 10 mln lekë, pensionistët s’blejnë dot bukë

Deputeti i Partisë Demokratike, Dash Sula, ka protestuar në nisje të seancës plenare në lidhje me gjendjen e pensionistëve në Shqipëri. Sula tha se rritja e pensioneve që është bërë nga qeveria nuk u mjafton personave të moshuar as për blerjen e gjysmë buke masive në ditë.

Deputeti i PD u shpreh kundër rritjes së rrogave për gjyqtarët e Gjykatës Kushtetuese, të cilët sipas tij do të përfitojnë sa marrin pensionë 100 të moshuar gjatë një muaji.

Ai tha se qeveria nuk duhet ta polarizojë kaq shumë shoqërinë, duke bërë që gjyqtarët të jetojnë në lluks të shfrenuar dhe të moshuarit të mos sigurojnë dot ushqim.

“Qeveria e ka rritur pensionin 5 mijë lekë të vjetra që do të thotë dhe kjo gjysma e bukës përsëri me këtë 5 qind lekëshin nuk blehet. As një gjysmë buke nuk i ka rritur pensionet kjo qeveri. Kjo është e trishtueshme dhe e tmerrshme. Në një kohë që sjellin në parlament një projekt ligj për rritjen e rrogës së gjyqtarëve të Gjykatës Kushtetuese, ku rroga e tyre do të bëhet sa përfitojnë 150 persona me ndihmë ekonomike, ose sa marrin 80-100 pensionistë në një muaj.

Pasi ju e dini sa është pensioni në fshat. Një lluks i shfrenuar për Gjykatën Kushtetuese e cila është e gjitha nën uzurpimin e qeverisë.

Gjyqtarët e Gjykatës Kushteteuese do të marrin 8-10 milionë në vit, ndërkohë që pensionistëve u shtohet pensioni me vetëm 5 qindë lekë të vjetra në ditë.

Kjo është e tmerrshme dhe ajo që po ndodh në shoqërinë shqiptare. Unë doja të protestoja për këtë gjendje të mjerueshme ku janë prindërit tanë dhe gjyshërit tuaj. Polarizimi i shoqërisë është i tmerrshëm”, tha Sula.

LEXONI GJITHASHTU:

• “Lufta” brenda PD/ Açka: Po e bëjnë 2 B të tërbuar dhe një B i vaksinuar
• “I erdhi goja memecit”, Spiropali – Bashës dhe Berishës: Zgjidhni hallet e shtëpisë
• “Numëro sa kulla ke”-Përplasen Basha dhe Bardhi: Po bën luftë të ndyrë personale