Njohja e Kosovës nga Izraeli, Felicita Jakoel: Do ketë marrëdhënie shumë të ngushta ekonomike

Kryetarja e Shoqatës së Miqësisë Izrael-Shqipëri, Felicita Jakoel komentoi për Euronews Albania formalizimin e marrëdhënieve mes Jeruzalemit dhe Prishtinës.

Ajo tha se vendosja e marrëdhënieve diplomatike mes dy vendeve pritej prej kohësh, pasi “vitet e fundit marrëdhëniet ishin përforcuar”.

“Kujtoj pamjen e njerëzve me fëmijë që dëboheshin nga ushtria serbe gjatë luftës në Kosovë, kujtoja se kjo më bënte përshtypje vetëm mua, por pati një reagim të jashtëzakonshëm të izraelitëve, ku pati edhe demonstrata spontane”,  kujtoi Jakoel ndërgjegjësimin e izraelitëve rreth 20 vite më parë me ndihma, të cilat iu dërguan qytetarëve të Kosovës.

Zonja Jakoel theksoi se është shumë e sigurt “që do të ketë një marrëdhënie shumë të ngushtë ekonomike në fushën e teknologjisë”. 

“Do të ketë marrëdhënie të ngrohta dhe fitimprurëse nga të dyja vendet”, u shpreh ajo.

Sipas zonjës Jakoel, tashmë Izraeli do të nxisë vendet e tjera që të njohin Kosovën si shtet të pavarur.

“Jam e sigurt që kjo do të japë një shtysë që të gjitha vendet e botës ta njohin Kosovën”, përfundoi ajo.

Lexoni gjithashtu:

Raportet diplomatike Kosovë-Izrael, reagon Vuçiç

DASH përshëndet vendosjen e marrëdhënieve diplomatike Kosovë-Izrael

Izraeli firmosi njohjen e Kosovës, këshilltari Silaj: Është me interes tërheqja e investimeve