Basha i përgjigjet Ramës pas sulmit që ai i bëri programit ekonomik të PD-së

Kryetari i Partisë Demokratike Lulzim Basha iu përgjigj në një konferencë për shtyp me gazetarët komenteve të bëra më herët gjatë ditës nga kryeministri Edi Rama se programi elektoral i opozitës “është i dobët dhe pa shtyllë kurrizore”, sipas tij “njësoj si karakteri i udhëheqësit të saj”.

Fillimisht Basha mbrojti programin e paraqitur javën e shkuar mbi ekonominë duke theksuar se ai ka kohë që është nisur të hartohet “me ekspertizën më të mirë ndërkombëtare dhe lokale”. Kryetari i PD-së tha se në qendër të programit është familja dhe qytetari shqiptar.

“Pas të gjitha sulmeve që bën ai [Edi Rama], fsheh diku ndonjë premtim, dolëm me pagën minimale, sulm, sharje, fyerje, pastaj doli e mori dhe tha se do ta bënte ai, se si do ta bënte këtë një Zot e di, sepse s’e bëri për tetë vite me radhë. Ne e kemi planin se si do të shkojmë te rritja e rrogave, sepse kalon në një proces të tërë ekonomie,” – u shpreh Basha duke ironizuar se Rama nuk e kupton ekonominë.

Kreu i selisë blu rikujtoi disa nga pikat e programit, si paga minimale 30 mijë lekë e pataksuar, taksë e sheshtë 9% për pagat mbi pagën minimale, taksë jo më shumë se 0.5% e tatimit mbi xhiron për sipërmarrjet e vogla etj.

“Me këtë plan fiton rinia, pensionistët, mjekët, infermierët, mësuesit, pedagogët, të papunët, të varfrit. Fiton Shqipëria, humbet Edi Rama,” – theksoi Basha duke shtuar se “ia kuptonte nervozizmin”.

Ditën e sotme gjatë një konference për shtyp për ekonominë, Kryeministri Edi Rama sulmoi programin e opozitës për ekonominë duke thënë se ai është i gënjeshtërt, që nuk i shërben shtresave të mesme. Rama pranoi se partia e tij do të rishikonte mënyrën e ndarjes së taksës progresive, mbështetur prej saj prej vitit 2013, por theksoi se përmes kësaj formule gjatë kësaj periudhe 530 milionë dollarë janë mbledhur në arkën e shtetit.

Rama tha se heqja e kësaj takse dhe vendosja e një takse të sheshtë, propozuar nga PD-ja për 9%, ua kthen këto 530 milionë kompanive të mëdha “apo të ‘oligarkëve’ siç i quajnë këta [opozita]”.

Lexoni gjithashtu:

Rama: Do të rishikojmë taksën progresive për të ardhurat personale