”Ka etje për ndryshim”, Aldo Bumçi jep detaje nga programi elektoral i PD-së

Aldo Bumçi, drejtues politik i Partisë Demokratike tha në një intervistë për Euronews Albania se fushata e tyre lidhet drejtpërdrejt me dështimin që sipas tij ka qeveria Rama.

“Nuk ka pasur qeveri më të dobët, qeveri që të ketë dëmtuar ekonominë shqiptare, që të ketë sjellë fenomene si kriminalizimi, përhapjen masive të drogës dhe vrasjen e shpresës mbi të gjitha,” tha Bumçi.

Nga ana tjetër ai e konsideroi një aspekt pozitiv faktin që programi ekonomik i Partisë Demokratike po shihet me detaje, sepse sipas tij kjo tregon etjen për ndryshim, si pasojë e premtimeve të pambajtura të kryeministrit Rama.  

Aldo Bumçi theksoi gjithashtu se Partia Demokratike nuk është një forcë e re politike që po vjen me premtime por vjen me një plan konkret dhe një pjesë të atyre që propozojmë i kemi zbatuar.

Ai përmendi uljen e çmimit të energjisë elektrike apo të naftës si modele që tregojnë se Partia Demokratike, si një forcë që e ka udhëhequr vendin, ka besueshmëri në këto premtime. Bumçe nënvizoi se ishte Edi Rama ai që rriti kostot gjatë qeverisjes së tij dhe PD do i kthejë sërish atje ku ishin.

“Këto nuk janë premtime, që çdo parti mund të bëjë një listë dëshirash. Këto janë të realizueshme sepse janë realizuar,” – drejtuesi politik i PD-së.

Sa i takon deklaratës së kryeministrit se vota i jepet karakterit të kryetarëve të partisë dhe jo programeve të fushatës, Bumçe e konsideroi një deklaratë të bërë si pasojë e dëshpërimit.

Sipas tij karakteri i një partie dhe liderit apo anëtarëve të saj nuk mund të matet ndryshe por vetëm duke bërë me dije ato që ka për të ofruar.