“Nuk doja të vdisja e virgjër”, shfaqja teatrale vihet në teatrin e Durrësit

Historia e një vajze adoleshente “të burgosur” në një karrige me rrota, për shkak të një aksidenti tragjik në det. Kjo është shfaqja teatrale “Nuk doja të vdisja e virgjër”, që të mërkurën erdhi për publikun durrsak në sallën e teatrit “Aleksandër Moisiu”.

“Është një titull simbolik, ku në plan të parë duket sikur flet vetëm për anën seksuale, por është në dimensionin më të madh të qasjes me jetën. “Nuk doja të vdisja e virgjër”, thotë teksti, ‘pa prekur diellin, ajrin’, të gjitha ndjesitë e jetës, ashtu si çdokush ka të drejtë t’i jetojë të gjitha nevojat, si fiziologjike, ashtu edhe humane, si të gjithë njerëzit, pa bërë dallime,” – tha Gjergj Mena, regjisor i shfaqjes.

Aktorja kryesore, Ina Gjonçi rrëfen vështirësitë, por mbi të gjitha përgjegjësinë që ka ndjerë për të sjellë në skenë dhimbjen dhe forcën e personave me aftësi të kufizuara.

“Profesioni jonë nuk është gjithmonë dëshirë. Më pas e kam kuptuar, që ka qenë një rrezik dhe sfidë që kërkon një lloj përgjegjësie, aq më tepër kur përfshin njerëz që e kalojnë në lëkurën e tyre jetën e personazhit,” – u shpreh Gjonçi.

Kjo shfaqje teatrale synon të shërbejë si një moment reflektimi për të drejtat e PAK, por edhe të hapë diskutime në lidhje me temën tabu të seksualitetit dhe marrëdhënieve intime të personave me aftësi të kufizuar.

LEXONI GJITHASHTU:

• Tingujt e muzikëz jazz vijnë në Teatrin e Operas dhe Baletit
• Një vallëzim me UNI-n, nata e fundit e baletit në Teatrin Kombëtar të Operas