Prova e vërtetë, Vllaznia kërkon shkëputjen përballë Laçit

Java e fundit e fazës së dytë të kampionatit shqiptar të futbollit rezervon përballje interesante.

Vllaznia dhe Laçi do të masin forcat këtë të premte në stadiumin Loro Boriçi. Shkodranët synojnë të ruajnë ritmin me rezultate pozitive si dhe diferencën prej 9 pikësh me ndjekësit.

Në ndeshjen e fundit Vllaznia e drejtuar nga gjermani Thomas Brdaric u ndal në barazim pa gola nga Partizani. Në këtë përballje shkodranët luajtën me dhjetë lojtarë pas daljes me karton të kuq të mesfushorit Ardit Krymi.

Ky ishte barazimi i dytë radhazi pa gola për Vllazninë pas barazimit 0-0 me Kastriotin. Laçi përfitoi nga kjo ndalesë duke fituar minimalisht 1-0 ndaj Teutës e duke shkurtuar relativisht distancën me kreun.

Pas 17 javësh kampionat, Vllaznia kryeson me 37 pikë, 9 më shumë se Partizani dhe 10 më shumë se Laçi e Teuta të vendit të tretë e të Katërt.

Vllaznia 9 herë kampione e Shqipërisë nuk e fiton titullin prej dhjetë vitesh, ndërsa trofeu i fundit që ata kanë fituar ka qenë Kupa e Shqipërisë – në vitin 2008.