Basha mbledh drejtuesit e PD-së në qarqe: Bashkë për të sjellë shpresë

Kryetari i Partisë Dmokratike Lulzim Basha mblodhi pasditen e së dielës sekretariatin dhe drejtuesit e shtabeve zgjedhore për zgjedhjet parlamentare të 25 prillit.

Pak orë pasi u mor vesh nga gazetarët, pasi mbledhja ishte e pa-paralajmëruar për mediat, Basha postoi një foto në Facebook me mbishkrimin “bashkë do të sjellim shpresë të re për Shqipërinë. Me 25 prill Shqipëria Fiton!”.

Jo-zyrtarisht mësohet se në mbledhje është diskutuar pikërisht për udhëzimet që do të kenë parasysh për fushatën drejtuesit politik të PD-së në qarqe.

Mbledhja vlen të thuhet se u bë pak ditë pasi kryesia e PD-së shpalli përfundimisht drejtuesit e shtabeve zgjedhore.

Në Tiranë u vendosën tetë drejtues: Albana Vokshi, Aldo Bumçi, Alfred Rushaj, Agron Shehaj, Blendi Këlliçi, Flamur Noka, Jorida Tabaku dhe Grida Duma.

Për qarqet e tjera u vendos për emra si Edi Paloka (në Durrës), Gazment Bardhi (në Elbasan), Helidon Bushati (në Shkodër), Enkelejd Alibeaj (në Fier), Tomorr Alizoti (në Berat), Tritan Shehu (në Gjirokastër), Mark Marku (në Lezhë), Bujar Leskaj (në Vlorë), Edmond Spaho (në Korçë), Xhelal Mziu (në Dibër) dhe Flamur Hoxha (në Kukës).

Kjo ishte mbledhja e parë në PD pas këtyre përzgjedhjeve.