Valverde drejt shkarkimit, Xavi Hernandez projektohet si trajner i ardhshëm i Barcelonës

Eliminimi në Superkupën e Spanjës përballë Atletico Madrid me sa duket e ka mbushur kupën për trajnerin e Barcelonës, Ernesto Valverde. Drejtuesit e katalanasve nuk e kapërdijnë dot faktin që skuadra nuk arriti që të administronte si duhet avantazhin që kishte dhe u eliminua nga turneu. Shto këtu fatin që nën drejtimin e Valverdes skuadra ka patur shumë ulje-ngritje.

Menjëherë pas gjysmëfinales së humbur drejtuesit e Barcelonës janë takuar në Doha me Xavi Hernandez. Me sa duket kampionët e Spanjës shohin tek ish-mesfushori njeriun e duhur për të marrë përsipër drejtimin e skuadrës.

Fillimisht ideja ishte që Xavi të ulej në stolin e skuadrës në fundin e këtij sezoni por me sa duket Valverde po e humbet për ditë e më shumë besimin dhe po mendohet që Hernandez të marrë drejtimin e ekipit menjëherë.

Lajmin e bëjnë të ditur vetë mediat spanjolle që janë pothuaj të sigurta që Barcelona do të ketë një trajner të ri.

Mendohet se për ish-mesfushorin po mendohet një kontratë për dy vite ku ai të ketë mundësinë të tregojë vlerat e tij, kësaj here si trajner.