Provimet e maturës, Rezana Vrapi: Do jemi të kujdesshëm për një test sa më komod

Për të dytin vit matura shtetërore përballet me një situatë të vështirë për zhvillimin e orëve përgatitore dhe provimeve. Megjithatë nga Qendra e Shërbimeve Arsimore sigurojnë se situata do të merret parasysh nga hartuesit e testeve dhe specialistët “do të jenë të kujdesshëm” për të përpiluar një test me vështirësi “drejt mesatares”.

Kjo u tha gjatë një interviste për Euronews Albania nga drejtuesja e Qendrës së Shërbimeve Arsimore (QSHA), Rezana Vrapi.

Drejtuesja tha se specialistët e QSHA kanë ndjekur në vazhdimësi ecurinë e pandemisë dhe ndikimit në procesin mësimor. Ajo tha se në tërësi elementët fiks si struktura e përmbajtjes së provimeve janë përcaktuar prej kohësh dhe se aktualisht po punohet me trajnimin e mësuesve – ku kanë mbetur vetëm mësuesit e Tiranës.

“Ka ndjeshmëri të kujdesshme nga specialistët e ndërtimit të testeve, duke pasur parasysh se mësimdhënia ka qenë jashtë mase e cunguar, me mësim nga shtëpia dhe kjo do të merret parasysh. Për këtë arsye nivelet e testit do të synojnë drejt mesatares dhe të thjeshtit,” – u shpreh Vrapi përballë pyetjes së gazetares Esmeralda Mulaj rreth vështirësive që kanë hasur nxënësit dy vitet e fundit.

Për “ndjeshmëri të kujdesshme” zyrtarja e arsimit shpjegoi se nënkuptonte mos vendosjen e vështirësive të tepërta maturantët.

“Dua t’i qetësoj [maturantët] që do të jemi ekstremisht shumë shumë të kujdesshëm si staf për t’u çuar në ditën e provimit një test, për të cilin ata do të ndihen komod,” – tha Vrapi.

Mënyra e vlerësimit të provimeve të maturës nuk do të ndryshojë ku 25% e pikëve të totalit do të jenë të mjaftueshme për notë kaluese.