KQZ në Kosovë bën me dije masat anticovid që do të mbahen ditën e zgjedhjeve

Ndërkohë që zgjedhjet në Kosovë do të zhvillohen këtë të dielë, Komisioni Qendror i Zgjedhjeve i ka njoftuar qytetarët e Kosovës për masat anticovid që duhet të zbatojnë në ditën e zgjedhjeve.

Për të votuar fillimisht qytetarët duhet të mbajnë maskë mbrojtëse duke mbuluar hundën dhe gojën.

Gjithashtu duhet mbajtur distancë fizike dy metra mes personave, nderkohë që pritët në radhë për të votuar. Gjatë hyrjes në vendvotim duhet që votuesit të dezinfektojnë duart dhe më pas të prezantojnë dokumentin e identifikimit. Maska mbrojtëse duhet hequr me qëllim që të identifikohet personi nga anëtari i vendvotimit, dhe më pas të rivendoset.

Pas kësaj duhet të merrët fleta e votimit dhe të hidhet në kutinë e votimit.
Në përfundim të kësaj procedure duhet të dezinfektohen serish duart.

Shumë qytetarë për shkak të pandemisë Covid-19 janë të izoluar, por edhe ata do të marrin pjesë në zgjedhje. Lajmin e bëri të ditur zëdhënësi i Komisionit Qendror të Zgjedhjeve, Valmir Elezi, i cili u shpreh për mediat e Kosovës se do të ketë disa ekipe në terren për të mundesuar votimin e personave në izolim për shkak të Covid-19.

Çdo ekip do të përbëhet nga katër anëtarë, ku tre do të jenë përfaqësues të partive politike dhe një punonjës shëndetësie.

Gjithsej do të jenë në terren 416 persona të angazhuar për të mundësuar votimin e qytetarëve të karantinuar.