Rama: Masat e reja anti-COVID duhen zbatuar rigorozisht nga të gjithë, duke nisur nga partitë politike

Kryeministri Edi rama bën thirrje që masat e reja kufizuese anti-COVID të zbatohen nga të gjithë duke nisur nga partitë politike teksa paralajmëron se ora policore do të mbikëqyret rreptësisht për çdo individ apo biznes.

Përmes një statusi në faqen e vet në Facebook, kreu i qeverisë risjell në vëmendje vendimet e bëra publike ditën e sotme nga Komiteti Teknik i Ekspertëve, që vendosën kufizimin e qarkullimit për individët, por edhe aktivitetin e bareve, restoranteve, fast food dhe lokaleve që ofrojnë shërbim për klientët, nga ora 20:00 deri në orën 06:00, në të gjithë vendin.

Gjithashtu, Komiteti i Ekspertëve vendosi që shkollat e mesme në zonat me risk të lartë, ku përfshihen bashkitë: Tiranë, Fier, Vlorë, Berat, Durrës, Gjirokastër, Lezhë, Lushnje, Pogradec dhe Kamëz, do të zhvillojnë mësimin online, nga data 11.02.2021 deri në datën 26.02.2021.

Ndërkohë, sezoni i provimeve për universitetin do të zgjatet, për të siguruar kombinimin e provimeve online dhe në auditor, për lëndët që kërkojnë prezencë të domosdoshme, sipas vlerësimit të MASR, duke zbatuar rreptësisht protokollet anti-COVID.