Ndërpritet ndeshja Skënderbeu-Egnatia, shkak gjendja shëndetësore e tifozit

Është ndërprerë për disa minuta ndeshja mes Skënderbeut dhe Egnatias që po mbahet për javën e 10-të të Superligës shqiptare.

Shkak është bërë gjendja shëndetësore e një tifozi i cili ndodhej në tribunën C të stadiumit. Burime thanë se bëhet fjalë për një 40 vjeçar, i cili duke ndjekur ndeshjen është rrëzuar në shkallët e stadiumit duke alarmuar tifozët.

Kane qenë mjekët e dy ekipeve që kanë dhënë ndihmën e parë, pasi gjendja ishte e rëndë.

Pas marrjes së ndihmës së parë mjekësore, tifozi korçar është dërguar me urgjencë në spitalin rajonal.

Gjendja e tifozit është e stabilizuar ndërsa po merr shërbimin e nevojshëm mjekësor.

Sakaq nuk dihen ende arsyet se pse tifozi u ndje keq dhe humbi ndjenjat.