”Duhet të mbyllen për dy javë baret e restorantet”, mjeku Alimehmeti tregon situatën epidemiologjike në vend

Epidemiologu Ilir Alimehmeti u shpreh në Euronews Albania se masat e reja anti-COVID të marra nga qeveria nuk do të kenë një ndikim madhor në situatën epidemiologjike në vend.

Mjeku theksoi se më shumë ndikim mund të ketë mbyllja e gjimnazeve në disa bashki, pasi të rinjtë nuk do të kenë kontakt me njëri-tjetrin.

Ndërsa sa i përket kufizimit të lëvizjes pas orës 20:00, ai tha se qytetarët do të ulen nëpër lokale më herët dhe gjithsesi do jenë në kontakt.   

“Do kishte shumë më tepër sens, kundrejt mbështetjes së fortë ekonomike të sektorit, mbyllja e plotë për dy javë e bareve dhe restoranteve”, propozoi mjeku.

Sa i përket rasteve të reja, ai tha se numri është shumë më tepër.

“Rastet janë shumë më tepër se kaq, sepse vetëm 3% e popullatës totale të Shqipërisë është e identifikuar që e ka kaluar apo është aktive sot”, u shpreh mjeku.  

Sipas tij gjithçka varet nga numri i testimeve, sa më shumë testime, aq më shumë raste të identifikuara.

Lexoni gjithashtu:

Masat anti-Covid, zgjatet kufizimi i lëvizjeve, në 10 bashki gjimnazet kalojnë me mësim online

Manastirliu: Vaksinat e radhës nga kompania Pfizer do të vijnë më 15 shkurt