Bisedime në samitin e Maltës, Kiev-Moskë akuzojnë njëra-tjetrën

“Formula e Paqes” për Ukrainën, e sugjeruar nga Volodymyr Zelensky është në fokus të diskutimeve në Maltë, ku po mbahet samiti i tretë ndërkombëtar.

Mbi 65 vende nga e gjithë bota janë të përfaqësuar, përveç Kinës që refuzoi pjesëmarrjen dhe Rusisë që nuk u ftua.

Nga ana e saj, Moska akuzoi të shtunën Ukrainën se kreu një sulm me dronë ndaj një impianti bërthamor në qytetin e Kurskut. Sipas mediave ruse, sistemet e mbrojtjes ajrore arritën të rrëzonin tre dronë, pjesët e të cilëve dëmtuan lehtë fasadën e godinës së impiantit nuklear.

Të shtunën, forcat ruse vazhduan bombardimin e rajonit të Khersonit. Në kryeqendrën e rajonit dhe në fshatrat përreth 7 persona mbetën të lënduar.

Më vonë gjatë së njëjtës ditë, të paktën tre shpërthime u dëgjuan në Krimenë e aneksuar. Mediat ukrainase raportuan se sistemet mbrojtëse ruse kishin hapur zjarr, por disa dronë të paidentifikuar kishin vazhduar fluturimin.

LEXONI GJITHASHTU:

• “Izraeli të marrë kontrollin e Gazës”, Petreaus: Viktimat civile të pashmangshme
• Vuçiç: Të gatshëm për gjithçka që s’përfshin njohjen e anëtarësimin e Kosovës në OKB