Nikolin Jaka tregon mënyrën si mund të rimëkëmben bizneset

Kreu i Dhomës së Tregtisë dhe Industrisë, Nikolin Jaka tregoi se as nga sipërmarrja as nga institucione të tjera nuk pritet që në anketat e vitit 2020 të ketë rezultate pozitive.

“Paketat e ofruara nga qeveria shqiptare në formën e garancisë sovrane ishin paketa të cilat realisht nuk funksionuan siç duhet, kjo është dhe arsyeja se përse ato paketa vazhdojnë të ngelen edhe sot në ofertë,” – tha Jaka.

Në opinionin e tij, nuk ka nevojë për paketa shtesë por për saktësim të kësaj pakete sovrane që është aktualisht.

Kreu i Dhomës së Tregtisë dhe Industrisë sqaroi se për qeverinë shqiptare është përgatitur një plan me 30 pika dhe tani që jemi përsëri në një gjysmë mbyllje sipas Jakës është e nevojshme që të ndërhyhet me paketa financiare.

Ndërkohë që marrja e masave të reja nuk shihet si diçka pozitive.

“Sipërmarrja shqiptare është e plagosur dhe thjesht ato plagë do thellohen më shumë,” – përfundoi Jaka.