Shqipëria e mbuluar nga bora, vështirësi në qarkullimin e mjeteve në disa akse të vendit

Reshjet e dëborës dhe temperaturat e ulëta që kanë shoqëruar vendin në 48 orët e fundit kanë shkaktuar jo pak problem në qarkullimin e automjeteve në disa akse të vendit.

Segmenti Milot-Lezhë vijon të jetë problematik për shkak të ngricës së krijuar në rrugë. Tepër problematike paraqitet situata edhe në aksin Qafe-Thanë-Doganë, ku reshjet e dëborës vijojnë ende duke shkaktuar vonesa dhe radhë të qytetarëve që po kalonin në shtetin fqinj.

Në këtë segment është punuar gjatë gjithë natës për të hapur rrugën ku është bërë i mundur hapja e një korsie e cila është e kalueshme vetëm nga mjetet e mëdha ose fuoristradat.

Ndonëse autoriteti rrugor ka informuar se pjesa më e madhe akseve në vend janë të kalueshme vështirësi në lëvizje është hasur në disa qytete të rajonit verior dhe atë qendror.

Autoritetet i kane bërë thirrje drejtuesve të automjeteve të reduktojnë shpejtësinë e të lëvizin vetëm me goma dimërore dhe zinxhirë.

Ndërkaq, nisur nga situata e krijuar në terren janë angazhuar dhe forcat e armatosura dhe policia e shtetit duke asistuar në pastrimin e disa akseve ku është konstatuar vështirësi në lëvizje.