Fitorja bindëse e VV-së, Bytyçi: Epoka e Albin Kurtit ka filluar si një epokë kundër krimit

Lektori i shkencave politike në Universitetin “Aleksandër Moisiu”, Enver Bytyçi tha se rezultati arritur nga Vetëvendosja në zgjedhjet e 14 shkurtit ishte i pritshëm.

Ai u shpreh në Euronews Albania se ky hap është fillimi i një epoke të re për shtetin e Kosovës. Sipas tij, Kosova ka kalur tri epoka politike, atë të ish-presidentëve Rugova e Thaçi, dhe tashmë shtoi z. Bytyçi ka nisur ajo që ai e cilëson si “Epoka Kurti”.

“Rezultati ka qenë i pritshëm, ka qenë i parashikuar. Unë kam besuar se ky ndryshim do të ndodhte. Ky është fillimi i ri i një epoke tjetër. Kosova ka kaluar tri epoka; epoka Rugova, epoka Thaçi dhe tani ka filluar epoka Kurti”, tha ai.

Profesori i njohur shpjegoi thelbin e këtyre epokave, duke shtuar se nën drejtimin e Albin Kurtit, Kosovës dhe qytetarëve të saj do t’u kthehet shpresa.

“Epoka Rugova ishte epoka e prijësit, çka shqiptarët e kanë për qejf ta artikulojnë dhe ta duan, e Thaçit nisi si epokë luftë dhe  idealesh për lirinë e Kosovës, por përfundoi si epokë kusarësh dhe kaçakësh, në kuptimin e përvetësimit të pasurive të qytetarëve, ndërsa epoka e Albin Kurtit ka filluar si një epokë kundër krimit dhe korrupsionit, si epokë që kthen shpresën për qytetarët e Kosovës”, tha ai.