Begaj në Panairin e Librit: Gjithçka “flet” shqip, falë shkrimtarëve e botuesve

Presidenti i Republikës Bajram Begaj, vizitoi këtë të premte Panairin e Librit që ka çelur dyert për publikun në Tiranë, për të 26-in vit me radhë.

Kreu i Shtetit u ndal në të gjitha stendat e botuesve shqiptarë të Shqipërisë, të Kosovës, Malit të Zi dhe Maqedonisë së Veriut.

Gjatë bisedës me botues, shkrimtarë dhe përkthyes Presidenti Begaj u shpreh se në këtë panair gjithcka “flet” shqip, me autorë të vjetër e të rinj, personalitete botërore me influencë në të shkuarën dhe të tashmen, dhe e gjithë kjo falë shkrimtarëve, përkthyesve, botuesve që ndjekin këtë traditë të mirë.

“Përgëzime për të gjithë ata që me pasion për dijen dhe gjuhën amtare po kontribojnë ndjeshëm në ruajtjen dhe forcimin e identitetit tonë kombëtar!”, – u shpreh Presidenti Begaj.

Gjatë kësaj vizite Presidenti i Republikës bisedoi edhe me lexuesit e vegjël, të cilëve u përcolli përgëzime për praninë në panair duke u shprehur se “ata e duan librin, edhe pse janë brez i jetës virtuale dhe kjo është dëshmi e ruajtjes dhe e përcjelljes së një tradite të hershme shqiptare”.

“U ndjeva plot gëzim nga fakti që sërish në panair pashë të gjitha moshat. Të shohësh të gjithë brezat në shtëpinë e dijes, të mbush me urtësi dhe shpresë”, – u shpreh Kreu i Shtetit, i cili e vlerësoi Panairin e Librit si një “bilbiotekë të madhe shqiptare”.

LEXONI GJITHASHTU:

• Basha në Panairin e Librit: Më bëhet zemra mal kur shoh të rinj që lexojnë
• Nis panairi i 26 i librit në Tiranë! Libra të rinj, autorë e përkthyes të pranishëm