Policia fshehu sulmin banditesk në Krujë, Vurmo: Toleranca ndaj krimit në këtë zonë i bën bashkëpunëtorë

Katër persona të maskuar dhe me armë në dorë, kanë mësyrë 2 ditë më parë në një lokal në Fushë -Krujë, duke dhunuar brutalisht një 30-vjeçar. Policia nuk raportoi në kohë ngjarjen dhe vetëm sot, pas interesimit të madh mediatik, njoftoi se materialet i janë referuar prokurorisë së Krujës për hetim.

Drejtori i Institutit për Demokraci dhe Ndërmjetësim Gjergji Vurmo në një intervistë për Euronews Albania tha se Fushë-Kruja është një nga ‘hot spotet’ e krimit të organizuar në vend, ku krimi jo vetëm ka marrë hov, por edhe toleranca ndaj krimit si nga ana e institucioneve, por edhe qytetarët, është në nivele alarmante.

Sipas tij, mungesa e ndjeshmërisë ndaj krimit në këtë zonë ka çuar në kriminalizimin e institucioneve dhe shoqërisë.

“Vetë komuniteti i toleron ngjarje të tilla. Kemi të bëjmë jo vetëm me institucione që tolerojnë, por edhe vetë komuniteti që e toleron. Kryebashkiaku i Krujës është një person me precedentë penalë, por atë e kanë zgjedhur vetë qytetarët”, tha z. Vurmo.

Mosraportimi i ngjarjes në komunikatën e policisë sipas tij, është fshehje e krimit që duhet hetuar nga SHÇBA dhe tregon në një farë mënyrë se policia është bashkëpunëtore në krim.